cs-6.txt

"چنگڵ شاهین" ناوێکمان تێدابوو، هەركاتێك نۆرە ئێشکی بووایە هەموومانی خەنی دەکرد. بەڵام من بە پێچەوانەی هەموو کوڕەکان لەوبەشەدا دەست وپێ سپی بووم و هەروەختێك ویستبام قاپەچێشتێك پاشقول بدەم هەموو گیانم دەلەرزی، ڕەنگم دەبزڕکاو ئارەق بەموورەگەی پشتم دا دەهاتە خوار. هەر لەبەر ئەوەش ناویان نابووم "گێلە پیاو"و هەروەخت کەیفیان ساز بوایە سەریان داویشتە سەرم و گاڵتەیان پێ دەکردم. شەوێ كاتی خەوتن یەكێك بەتانی لێ دەرفاندم، یەکێك تنۆکەکەمی دادەکێشا. "بورهان شەیپپووری" گووپی پڕ لەئاو دەکردو بەسەروچاویدا دەکردم، بەکورتی ئەوەندەیان ئازار دەدام کەناچار بووم منیش ئاکاری ئەوان ڕەچاوکەم. شەوێك کە نۆرە ئێشکی من بوو کوڕەکان داوایان لێکردم کە بچمە مەتبەخ و خواردنی زیادی یان بۆبێنم. ئەمە ئەو کارە بوو کە من لێی دەترسام. گوتم:

کوڕینە ئەمشەو "هەقی باڵیۆز" ئەفسەر ئێشکە، بەڕاستی شتی وام لەدەست نایە. کوڕە هەست پێ بکا ڕیشەم دەردێنێ. بەڵام ئەوان وازیان لێ نەهێنام "هەرکەس هەیە بەجەهەننەم".

"ئەگەر دەترسی دەنگ بکە". هەرچونێك بوو وەسەر تەڵەیان پەڕاندم. هەرچەندە دەمزانی "هەقی باڵیۆز" پیاوێکی تووڕەو تۆسنە ڕۆیشتم بۆلای مەتبەخ. "هەقی باڵیۆز" ئەفسەرێکی کۆنەکار بوو. لەگەڵ ئەوەش کە خوێندەواری کەم بوو، بەڵام لەبەر ئەوەی پیاوێکی کارامەو دنیادیدە بوو کوڕەکان زراویان لێ چووبوو.
سەرو سیمایەكی سەیری هەبوو، لەسەر گۆنای كۆنە برینێك هەبوو هێندەی تری بەسام کردبوو. لە ئاکاری سووك بەتایبەتی پێکەنینی قوتابیەکان زۆر ڕقی هەڵ دەستا. هەمیشە ئامۆژگاری دەکردین "سەرباز دەبێ هەموو وەختێك